Akarnano

Akarnano (helene Ἀκαρνάν, latine Acarnan) estis en la helena mitologio filo de Alkmeono de Argo kaj de lia dua edzino Kalirhoo. Avo de Akarnano Amfiarao estis aŭguristo kaj unu el la estroj en la milito Sep kontraŭ Tebo. Akarnana patro Alkmeono gvidis armeon de Epigonidoj, kiu Tebon konkeris kaj detruis. Malbonan rolon en ambaŭ militoj ludis avino de Akarnano, Erifilo, kiu lasis sin subaĉeti de Poliniko, reĝido elpelita el Tebo, kaj post dek jaroj de lia filo Tersandro. Ili petis, ke ŝi sian edzon kaj siajn filojn Alkmeonon kaj Amfiloĥon sendu en la militon kaj tiel helpu al Poliniko kaj Tersandro reveni en Tebon. Por tiu ĉi ago ŝi ricevis valorajn donacojn - kolringon kaj sorĉmantelon, kiujn donacis Afrodito al Harmonio, edzino de la fondinto de Tebo, Kadmo.

Antaŭ sia forveturo en la militon Amfiarao, sciante pri perfido de sia edzino, petis siajn filojn Alkmeonon kaj Amfiloĥon, ke ili post fino de la milito mortigu la patrinon, kiu pro valoraĵoj sendis sian edzon kaj filojn en danĝeron de morto. Tiel fakte okazis kaj Alkmeono, aŭ eble ambaŭ fratoj, post reveno el la Milito de Epigonidoj sian patrinon mortigis. Ankoraŭ antaŭ la morto Erifilo sukcesis siajn filojn malbenigi. Post tiu faro Alkmeonon persekutis Erinioj tiel, ke li devis foriri el Argo eksterlanden . Tie li edziĝis al Arsinoo kaj donacis al ŝi ambaŭ valoraĵojn. Sed li mem devis iri plu en la mondon kaj okazis, ke li edziĝis duafoje al Kalirhoo. Tion Alkmeono tenis en sekreto, sed la valoraĵojn li volis de Arsinoo reakiri. Poste ĉio senvualiĝis kaj bopatro Fegeo lasis Alkmeonon mortigi.

Kiam tion eksciis Kalirhoo, petis diojn pri helpo. Je ŝia deziro Zeŭso plenkreskigis ŝiajn du malgrandajn filojn dum unu nokto en fortajn virojn. La fratoj, Akarnano kaj Amfotero, foriris en Fegean reĝolandon kaj sian patron venĝis mortiginte Fegeon kaj liajn du filojn.

Post tiu ago Akarnano kun sia frato transloĝis ĝis en okcidentan marbordon, en landon, kiu pli poste estis nomata Akarnanio.