| „ Tiu ĉi 63-a volum o sub la marko Stafeto, kiel ĉiu libro pri aparta branĉo de scienco aŭ tekniko, vekas nian atenton al la konsidero, ke mankas en Esperantujo multaj fakaj verkoj per kiuj nia literaturo povu atingi egalan nivelon ol tiuj de la evoluintaj naciaj lingvoj. Ni povas fieri pri niaj belliteraturaĵoj, sed da fakliteraturo, eĉ la plej fundamenta, mankas multo. Kiel diras W. F. Rolt, neniu denaska esperantisto povus ricevi eĉ elementan edukon, utiligante nur Esperanton; do kial miri, kiam ano de “postiĝinta” lando, kies literaturo estas verŝajne malpli ampleksa ol la nia, reĵetas Esperanton, ne pro tio, ke li malaprobas la belajn sentojn kaj ideojn enkorpiĝintajn en ties literaturo, sed ĉar li bezonas krome... informon. Do, malpli ni povus altiri la intereson de fakuloj, pere de niaj fakverkoj. Oni diras, ke lingvo estas grava ne nur pro la granda nombro da personoj ĝin parolantaj, sed ankaŭ pro la kulturaj valoraĵoj kreitaj en ĝi. Tio estas vero ankaŭ por la internacia lingvo kies celo estas konkeri la mondon. Fakte, ni jam havas valorajn verkojn, sed ne sufiĉe; eble pro tio, ke la esp-toj ne helpas aĉetante ilin grandkvante, por ke oni povu ilin eldoni multe pli ofte. Tiurilate ni devas danki la aŭtoron kaj Stafeton kiuj metis novan brikon en nian mankantan fakliteraturon.
La grundo, tiu supra tavolo de la Tero, estas ja vere aktuala temo, ĉar krom el la maro, el ĝi ni dependas ankoraŭ por nia vivsubteno. Oni jam ne povas kultivi kampojn kiel niaj praavoj.
Por intensa kultivado estas necese ke la konsisto de la grundo estu, laŭeble, la plej taŭga, sam e kiel la sterkado, kvanto da akvo, ktp. La nuna neta areo taŭga por kreskigi plantojn estas nur 10 procentoj de la tuta surfaco de nia planedo, kaj ties loĝantaro plinombrigas rapide kaj senĉese. Laŭ la Organizo pri Nutraĵo kaj Agrikulturo de la Unuiĝintaj Nacioj (F.A.O.), la mondo nombris du mil milionojn da personoj en la jaro 1937, tri mil milionojn en la jaro 1960,
kaj la nombro atingota en la jaro 2000 estas taksita kiel iom pli ol ses mil milionoj. En la nuntempa mondo la plimulto da homoj vivas misnutrataj aŭ subnutrataj, kaj la faktoro malpermesanta pli grandan produktadon de nutraĵoj fakte estas... manko de civilizo.
La grundo provizas ĉiaspecan m aterialon uzatan por konstruado de domoj, mebloj, fabrikado de vestoj, libroj kaj aliaj, sed la ĉefa celo de la agrikulturo estas provizi nutraĵon por homoj kaj bestoj.
“El la polvo de la Tero" estas tre interesa, kun dokumentita riĉa enhavo kaj fluida lingvo. Mi nur aldonu ke, kiel kutime en ĉiu volumo eldonita de Prof. Régulo Pérez, ĝi ne havas preserarojn. ” |
