Kastelo Hünnefeld
La akvokastelo Hünnefeld situas en la banloka komunumo Bad Essen en la oriento de la distrikto Osnabrück kaj en la okcidenta parto de la federacia lando Malsupra Saksio de Germanio, norde de la kanalo Mittellandkanal inter la komunumopartoj Harpenfeld kaj Wehrendorf.
Historio
[redakti | redakti fonton]La kastelo unue estis menciita en 1146 kiel la ĉefsidejo de la senjoroj de Hünefeld (kun unu "n"), kiuj estis ministeriuloj, do altrangaj oficistoj, de la diocezo Osnabrück, kiu tiutempe ne nur estis eklezia organizaĵo, sed ankaŭ estis regiona regno. En 1394, Everd von Haren iĝis la nova senjoro de la kastelo tra geedziĝo, kaj en 1432 li vendis la kastelon al sia bofilo Bernd von Dehem. La 17-an de marto 1447, la kastelo venis en la posedon de la nobela gento von dem Bussche, kiu antaŭe jam posedis la proksiman kastelon Ippenburg. En 1598, la familiaj linioj de Bussche-Ippenburg kaj Bussche-Hünnefeld disiĝis tra hereda dividado. Ambaŭ familioj ankoraŭ posedas la du respektivajn kastelojn en 2025.
Sur la loko de la unua kastelkomplekso, duparta akvokastelo estis konstruita en la 13-a jarcento. Supra kaj malsupra kastelo estas atestitaj en la 14-a jarcento. La hodiaŭa kastelo staras sur la loko de la antaŭa supra kastelo - la malsupra kastelo estis malkonstruita ĉirkaŭ 1600 por fari lokon por farmbiena korto kaj fortikaĵoj. La hodiaŭa grandbieno estis konstruita kun sia norda alo kiel parto de tri-ala komplekso de 1610 ĝis 1614. La suda flanka alo estis alkonstruita en 1658, post kiam la konstruaĵo kaj siaj loĝantoj pene travivis la diversajn konkeriĝojn de la tridekjara milito. La nuna konstruaĵo el la 17-a jarcento estas ĉefe renesanca kun iom da frubarokaj elementoj.
La kastelo estas ĉirkaŭita de ĉirkaŭfosaĵo, dua ĉirkaŭfosaĵo enfermas la tutan komplekson inkluzive de la farmbiena korto kun sia karakteriza kolombeja turo, ĝardeno kaj malnova kastelplaco.
Aneksaĵoj
[redakti | redakti fonton]La biena korto situas vidalvide de la antaŭa fasado de la ĉefkonstruaĵo. En la sudokcidento ĝi daŭre havas malfrumezepokan, rondan angulturon. La kastelkapelo nun estas parto de la norda farmkonstruaĵo.
Ekzistas ankaŭ:
- La kolombeja turo, konstruita en 1710, estas la plej okulfrapa konstruaĵo de la biena korto. La blanka, ronda turo kun pinta tegmento havas multajn enirtruojn por la kastelaj kolomboj sur sia ekstera muro. Ĝi situas en la areo de la unua kastelkomplekso de la 12-a jarcento.
- La domo Alte Rentei, "malnova impostejo", antaŭe estis impostadministra oficejo kaj nun estas utiligita kiel kafejo kun malgranda hotelo sur du etaĝoj.
-
norda alo -
la parka flanko -
-
domo Alte Rentei -
ekstera ponto -
ekstera fosaĵo
La parko
[redakti | redakti fonton]La parko limas la kastelon en la oriento. Ĝi estis konvertita en anglan pejzaĝan ĝardenon en sia nuna formo en 1840 kaj enhavas malgrandan oranĝejon. La ligo al la kastelo estas insulo en la parke pli larĝa interna fosaĵo, kiu estas konektita kaj al la teraso de la kastelo kaj al la vasta parko per ponto.