Katalogo de la Esperanto-Gazetaro

Katalogo de la Esperanto-Gazetaro estas historie grava bibliografio de planlingvaj periodaĵoj, publikigita en Jablonné n. Orl. (tiama Ĉeĥoslovakujo) ĉe la eldonejo Pražák en 1934, havanta 168 paĝojn en formato A6 (ĉ. 15x11 cm). Ĝin kompilis kaj komentariis József Takács, reviziis kaj kompletigis Paul Tarnow, helpis Ladislao Spierer.

Laŭ la antaŭparolo de Takács aldonoj estis planitaj. Kiam la baza verko aperis kun ioma malfruiĝo longe post manuskript-pretiĝo en 1934, la unua aldono kun 300 suplementaj titoloj jam estis prespreta, sed neniam publikigita. Ĉ. 1979 aperis pirata reeldono de la baza verko, probable en Hungarujo.

Enhavo

Krom la antaŭparolo kaj listo de mallongigoj la bibliografio konsistas el jenaj ĉapitroj:

I. Listo de la Esperanto-gazetoj
II. Aldona Listo de la gazetoj kun konstanta Esperanto-fako, rubriko, aldono, kurso aŭ resumo
III. Aldona listo de la gazetoj por aliaj mondlingvo-projektoj
IV. Alfabeta listo de la urboj, kie aperis Esperanto-gazetoj
V. Alfabeta registro de la landoj, kie aperis Esperanto-gazetoj
VI. Statistiko pri la Esperanto-gazetoj

La "Katalogo" celas suplementi la bibliografiajn indikojn pri la planlingvaj periodaĵoj troveblajn en la Bibliografio de Internacia Lingvo de Petro Stojan (1929).

Recenzoj

„ Ĝi estas ne nur utila, valora, necesa, dokumenta, sed ankaŭ interesa. Ni trovas la titolojn de la esperantistaj gazetoj kaj folietoj de gazetoj, kiuj enhavis esperantajn rubrikojn kaj de gazetoj de la diversaj mondlingvoj. Oni povas aparte trovi, en kiuj lokoj kaj landoj aperis la nomitaj, kaj statistikon pri 1276 gazetoj el 59 landoj kaj 459 lokoj. ” — 1934, Paul Bennemann, Lingvo Libro paĝo 58

„ Detaloplena listo de 1276 Esperantaj gazetoj, kaj 170 gazetoj kun Esperanta rubriko; kaj 195 aliaj, kun statistiko, kaj alfabetaj listoj laŭ lando kaj urbo. Altvalora dokumento por la historiisto kaj la kolektisto. Ĝi amasigas informojn nenie aliloke troveblajn. Oni petas helpon per korektoj kaj aldonoj por dua eldono, kaj por eventuala aldonoj. ” — La Brita Esperantisto - Numero 358, Februaro (1935)

	„ La aŭtoroj atingis sian celon kaj verkis la plej kompletan kaj fidelan inventaron de fruaj planlingvaj periodaĵoj, kiu daŭre restas baza referenc-verko. Moderna posteulo de la Katalogo estas: Rondo Takács. Inventaro de planlingvistikaj periodaĵoj. ” — Sant Pau d'Ordal: Hispana Esperanto-Muzeo 1992, 123 p. (prov-eldono).

Bibliografio

• Detlev Blanke. Interlinguistik und Esperantologie: Wege zur Fachliteratur. Esperanto-Dokumente 7. Bamberg: Deutsches Esperanto-Institut, 2003, 58 p. (en la germana kaj ankaŭ rete konsultebla tie ĉi Arkivigite je 2009-08-26 per la retarkivo Wayback Machine.

Eksteraj ligiloj

• Enciklopedio de Esperanto/K en sia originala formo en la Interreto
• Katalogo de Esperantomuzeo kaj Kolekto por Planlingvoj
• Katalogo de Heredaĵbiblioteko Hendrik Conscience
• Katalogo "Erfgoedbib" en LibraryThing