Rulperdriko
 | ||||||||||||||
|---|---|---|---|---|---|---|---|---|---|---|---|---|---|---|
 masklo ĉe bestoĝardeno de Toronto, Kanado
 ino ĉe bestoĝardeno de Tenesio, Usono
| ||||||||||||||
| Biologia klasado | ||||||||||||||
| ||||||||||||||
| Rollulus rouloul (Scopoli, 1786) | ||||||||||||||
| Konserva statuso | ||||||||||||||
Aliaj Vikimediaj projektoj
| ||||||||||||||
La Rulperdriko, Verda perdriko aŭ Krestoperdriko, Rollulus rouloul, estas mezgranda birdo de la familio de Fazanedoj de la ordo de Kokoformaj kaj subfamilio de Perdrikenoj. Ĝi estas ununura membro de la genro Rollulus.
Tiu malgranda membro de la grupo de la perdrikoj estas specio de loĝantaj birdoj en pluvarbaroj de malaltaj teroj en suda Birmo, suda Tajlando, Malajzio, Sumatro kaj Borneo. Ilia nesto estas grunda skrapaĵo kovrita per folioj, kiu estas kaŝita sub amaseto da mortinta foliaro. La ino demetas 5 aŭ 6 blankajn ovojn, kiuj estas kovataj dum 18 tagoj.
Malkutime ĉe kokoforma specio, idoj estas manĝigataj bekalbeke fare de ambaŭ gepatroj anstataŭ per plukado el grundo, kaj kvankam ili estas frumaturaj, ili ripozas en la nesto dum ili estas malgrandaj.
La Rulperdriko estas fortika mallongvosta birdo, 25 cm longa, kies masklo estas iom pli granda ol la ino. Ambaŭ seksoj havas kontrastegan kaj rimarkindan skarlatan makulon de nuda haŭto ĉirkaŭokule kaj tre ruĝajn krurojn sen sprono aŭ malantaŭa fingro.
La masklo estas metalecverda supre kun brilaj malhelbluaj subaj partoj kaj bruneca flugilzono. La kapo estas ornamita per alta ruĝa kresto, blanka verticomakuleto kaj nigraj bridoj. La ino havas pizverdan korpoplumaron aparte de la bruna flugilareo. Ŝi havas ardezgrizan kapon kun la bridoj sed sen punkto aŭ kresto. La beko estas malhela. Junuloj estas pli senkoloraj versioj de la plenkreskuloj de la sama sekso. La kanto estas ploreca fajfo si-ul, el kio onomatopee devenas la nomoj de la specio.
La Rulperdriko estas kutime vidata sola aŭ en paroj dum ili manĝas surgrunde fruktojn, semojn kaj senvertebrulojn. Kiam ĝi estas ĝenata, ĝi preferas kuri sed se necese ĝi flugas mallongdistance per siaj rondoformaj flugiloj.
Estas influo de la habitatodetruo sur tiu birdo, ĉefe pro lignoproduktado. Tamen ŝajne ĝi estas iom pli adaptebla ol la aliaj fazanedoj de Sudorienta Azio. La specio de la Rulperdriko estas pritaksata kiel Preskaŭ Minacata ĉe la IUCN Ruĝa Listo de Minacataj Specioj. Ĝi estas listita en la Apendico III de CITES.
Bildaro
[redakti | redakti fonton]-
Kaptivaj Rulperdrikoj nome masklo kun du inoj -
Masklo ĉe Bestoĝardeno de Toronto -
Rollulus rouloul
Referencoj
[redakti | redakti fonton]- BirdLife International (2004). Rollulus rouloul. Internacia Ruĝa Listo de Endanĝeritaj Specioj, eldono de 2006. IUCN 2006. Elŝutita 29a Decembro 2006. Preskaŭ Minacata.
- Pheasants, Partridges and Grouse de Madge kaj McGowan, ISBN 0-7136-3966-0
Eksteraj ligiloj
[redakti | redakti fonton]- ARKive - Bildoj kaj filmetoj de Rulperdriko (Rollulus rouloul) Arkivigite je 2007-03-13 per la retarkivo Wayback Machine
- BirdLife Species Factsheet Arkivigite je 2007-09-29 per la retarkivo Wayback Machine
- IUCN Ruĝa Listo
- Red Data Book Arkivigite je 2007-03-11 per la retarkivo Wayback Machine
| ||||||||||||||||||
