Lýdia Machová
| Lýdia Machová | |
|---|---|
| Persona informo | |
| Naskiĝo | 2-a de aprilo 1989 en Slovakio |
| Lingvoj | slovaka • angla • germana • Esperanto |
| Nacieco |  Slovakio
|
| Okupo | |
| Okupo | Interpretisto, mentoro, entreprenisto |
Lýdia Machová [ˈliːdija ˈmaxɔvaː] (naskiĝinta la 2-an de aprilo 1989) estas slovaka interpretistino, poliglotino, mentorino kaj prelegistino kaj entreprenistino. Krom sia denaska lingvo (la slovaka) ŝi scipovas 7 aliajn lingvojn, kaj strebas lerni novan lingvon ĉiun duan jaron[1]. Ŝi populariĝis ĉefe post prelego ĉe TED kaj TEDx[2]. Ŝi fondis la firmaon Jazykový mentoring s.r.o. (“Lingva mentorado”).
Vivkuro
[redakti | redakti fonton]Lýdia Machová studis traduksciencon kaj interpretadon (angla kaj germana lingvoj) ĉe la filozofia fakultato de la Komenia Universitato (Univerzity Komenského) en Bratislavo. Ŝi daŭrigis ĉi tiun studon ĉe doktora nivelo, diplomiĝinta kun la titolo de PhD kaj disertaĵo titolita Hodnotiaci formulár ako nástroj tlmočníckej sebareflexie u študentov: didaktické východiská (La taksada formularo kiel ilo por interpreti memreflekton ĉe lernantoj: didaktika fono)[3].
Ekde la aĝo de 15, ŝi instruis lingvojn (angla kaj germana) per privata instruado en lingvolernejoj.
Profesia vivo
[redakti | redakti fonton]Ŝi okupiĝis profesie pri sinsekva kaj samtempa interpretado dum 6 jaroj[4]. Ŝi interalie interpretis la prelegojn de mondfamaj prelegantoj kiel Anthony Robbins[1] (Poznań, Pollando, 2015), iama ĉefministro Iveta Radičová (Bratislavo, 2013), kaj ankaŭ ĉe la V4. pintkunveno de prezidentoj (Krakovo, 2013).
En 2016 ŝi komencis entrepreni[4]. Ŝi kreis por sia laboro novan kategorion, kiun ŝi nomis “lingva mentorado”. Machová fondis la retan firmaon Jazykový mentoring en aprilo 2017[5] kaj sub tiu ĉi marko disvastigas sian lingvolernadan filozofion sur la slovaka-ĉeĥa merkato. En 2018 ŝi fondis ĝian ekvivalenton en la angla, internacie pli konata sub la markonomo Language Mentoring s.r.o.[6].
En 2017[7] kaj 2018[8] ŝi estis, kune kun Peter Baláž, unu el la du ĉeforganizantoj de la plej granda tutmonda renkontiĝo de lingvemuloj, Polyglot Gathering, en Bratislavo.
Ŝi regule partoprenas konferencojn pri la temoj de entreprenemo, cifereca nomadismo kaj prelegis ĉe diversaj eventoj.
Lingvoj
[redakti | redakti fonton]Machová scipovas la slovakan (denaske), anglan (C2), germanan (C1–C2), polan (C1–C2), hispanan (C1), Esperanton (B2), francan (B2), rusan (B2) kaj svahilan (A1). Ŝi scipovis la slovakan signolingvon sed forgesis ĝin. Ŝi komencis lerni fremdajn lingvojn 11-jaraĝe en la lernejo. Ŝi nuntempe lernas novan lingvon ĉiun duan jaron[1].
Ŝi estas defendanto de memlernado de lingvoj, taksante la taskon de instruisto kiel helpan[1]. Ŝi agnoskas, ke eblas havi antaŭkapablon, kiu helpas lerni lingvojn, sed opinias, ke iu ajn kapablas lerni fremdan lingvon[4].
Surbaze de sia sperto, ŝi asertas, ke por efike lerni lingvon necesas 4 bazaj kondiĉoj[1]:
- la lernado devas amuzi la lernanton;
- necesas pasigi kun la lingvo sufiĉe da tempo;
- necesas uzi efikajn metodojn;
- necesas krei por si lernsistemon.
En 2016 ŝi prelegis en TEDx en Trenčín pri la temo “Kiel lerni lingvon kaj kial vi ankoraŭ ne sukcesis”.
En oktobro 2018 ŝi prelegis dum TED pri la temo “La sekretoj de lernado de nova lingvo”. En aprilo 2021 ŝia prelego havis 11,6 milionojn da spektoj[2].
Premioj
[redakti | redakti fonton]Ŝi ricevis la premion Cena za moderný inovatívny prístup (“Premio por moderna noviga aliro”) en la konkurso Podnikateľka Slovenska (“Entreprenistino de Slovakio”) en 2017[9].
Referencoj
[redakti | redakti fonton]- ↑ 1,0 1,1 1,2 1,3 1,4 Lýdia Machová (slovake). Jazykový mentoring. Alirita 2021-04-12 .
- ↑ 2,0 2,1 Lýdia Machová (oktobro 2018). The secrets of learning a new language (angle). TED talk. Alirita 2021-04-12 .
- ↑ (sk) Lydia Machova, Hodnotiaci formulár ako nástroj tlmočníckej sebareflexie u študentov: didaktické východiská [dizertačná práca], Academia.edu
- ↑ 4,0 4,1 4,2 Vladimíra Šebová (2019-01-09). Lýdia Machová (Jazykovy Mentoring.sk): Polyglotka valcuje svet online vzdelávaním (slovake). Podnikajte.sk. Alirita 2021-04-02 .
- ↑ Výpis z Obchodného registra Okresného súdu Trenčín (slovake). Alirita 2021-04-12 .
- ↑ Výpis z Obchodného registra Okresného súdu Trenčín (slovake). Alirita 2021-04-12 .
- ↑ Organizantoj (esperante). Plurlingvula kunveno 2017. Alirita 2021-04-12 .
- ↑ Organizers (angle). Polyglot Gathering 2018. Alirita 2021-04-12 .
- ↑ Víťazky súťaže Podnikateľka Slovenska 2017 (slovake). Podnikateľka Slovenska. Arkivita el la originalo je 2021-04-12. Alirita 2021-04-12 .
Vidu ankaŭ
[redakti | redakti fonton]- Poligloto
- Poliglot Gathering (plurlingva kunveno)
Eksteraj ligiloj
[redakti | redakti fonton]- (en) Retejo de Lýdia Machová
- (en) Lýdia Machová dum la oficiala TED-prelego en Novjorko
- (en) Lýdia Machová - Ten things polyglots do differently
- Filmeto pri la Poliglota Renkontiĝo en 2019, kiun partoprenis pli ol 600 poliglotoj el la tuta mondo inter kiuj parolis pli ol kvarono Esperanton, kiu fariĝis populara inter partoprenantoj. angle