Antikva loĝloko ekde la ŝtona kaj bronza epokoj, skribe unuafoje menciita en la jaro 770, kaj grava regiona centro dum la mezepoko, la historia urbo aparte konatiĝis en septembro 2007: Tiam sume sep boradoj cele al ebla posta uzo de geoterma energio por hejtado de la historia urbodomo kaŭzis, ke akvo eniris en subteran tavolon de anhidrito kaj ŝanĝis ĝin al gipso, duobligante la volumenon de la materio.
Sekve ekde la fino de 2007 la historia urbokerno de Staufen leviĝas je proksimume centimetro po monato. Historiaj konstruaĵoj en la tuta urbokerno ekhavis impresajn fendojn, pluraj ne plu uzeblas pro danĝero de kolapso, kaj ĉiumonate pli da ili apogendas per grandaj flankaj lignotraboj. Ĝis oktobro 2010, 247 historiaj konstruaĵoj estis damaĝitaj, kaj la nombro ankoraŭ altiĝas. Laŭ la stato de 2009, la materia damaĝo nur pro detruo de historiaj konstruaĵoj ampleksis inter 42 kaj 50 milionoj da Eŭroj, de tiam pli altiĝas, kaj aldoniĝas pliaj kostoj pro la penoj limigi la plian damaĝadon. La nivelo de grundakvo estis malaltigita, kvin el la sep bortruoj estis fermeblaj, tiel ke la plua detruo iom malpli rapide progresas, sed la lastaj du truoj ne plu fermeblas, kaj laŭ la stato de somero 2011 la problemo ankoraŭ ne solvatas.
