Verlag Enzyklopädie

Verlag Enzyklopädie
eldonejo • negoco • libroeldonejo vd
Dum	1956 - 1-a de novembro 1991
Sidejo	Leipzig
Lando	Germana Demokratia Respubliko • Germanio
	v • d • r

La popolproprieta entrepreno (germane Volkseigener Betrieb, mallongigite VEB) Verlag Enzyklopädie (iom libera traduko "eldonejo enciklopedia") en Lepsiko fondiĝis la 1-an de novembro 1956 kiel posedaĵo de la ŝtato GDR. Ĝi specialiĝis pri lingvoinstruiloj (vortaroj, lernolibroj ktp.), sed ankaŭ eldonis aliajn sciencajn fakverkojn. Ĝis la jaro 1980 eldoniĝis 1846 librotitoloj en suma eldono de 22,3 milionoj da ekzempleroj, kaj en la sekvaj dek jaroj ĝis la reunuiĝo de Germanio la eldonado daŭriĝis, sen ke ĝis nun vikipedie konatiĝis la ekzakta kvanto de pliaj eldonaĵoj kaj eldonkvantoj. Ĉiujare aperis proksimume 130 novaj eldonaĵoj. Post la reunuiĝo de Germanio en oktobro 1990 la okcidentgermana eldonejo Langenscheidt, specialiĝinta pri lingvoinstruiloj, transprenis la eldonejon la 1-an de novembro 1991.

Inter la eldonaĵoj ankaŭ estis pluraj konatoj verkaĵoj pri Esperanto por germanlingvanoj, ekzemple

tri Esperanto-vortaroj de la germana leksikografo Erich-Dieter Krause (cetere la eldonejo de li ankaŭ publikigis vortarojn indoneziajn-germanajn),
Taschenlehrbuch Esperanto de Till Dahlenburg kaj Peter Liebig en 1978 kun du akompanaj instruiloj,
Konversationsbuch Deutsch-Esperanto de Till Dahlenburg kaj Detlev Blanke en 1990, unu el la lastaj eldonaĵoj antaŭ la transpreno fare de la okcidentgermana eldonejo Langenscheidt.

Vidu ankaŭ

Esperanto-germanaj vortaroj